સાવ અચાનક બેઠાં બેઠા મનને સૂઝ્યું એવું…

આ ક્ષણને જકડી રાખું તો કેવુ?

જકડી રાખું શબ્દ અને એ વાત, વળી એ વાતનો તારો મર્મ…

જકડી રાખું શબ્દ કહેલા – મૌન રહેલા સર્વ…

જકડેલો એ અર્થ એ તો જાણે બરફને જક્ડયા જેવું…

આ ક્ષણને જકડી રાખું તો કેવું? 

જકડી રાખું એ ક્ષણ જેમાં વરસે સ્મૃતિ મેહ…

જકડી રાખું વરસેલો-નહીં વરસેલો એ નેહ…

જકડેલો એ ભાવ તો જાણે  રેતને જકડ્યા જેવું…

આ ક્ષણને જકડી રાખું તો કેવું?

જકડી રાખુ એ ક્ષણ જ્યાં હર શ્વાસે મહેકે તુ,

જકડી રાખું મ્હોરેલી-નહીં મ્હોરેલી એ લાગણીઓની બૂ

જકડેલી એ ફોરમ જાણે પવનને જકડ્યા જેવુ…

આ ક્ષણને જકડી રાખું તો કેવું?

 

- જીના-માનસી